Webgune honetan gure cookie-ak eta bitartekoenak erabiltzen ditugu soilik zure bisita optimizatzeko. Nabigatzen jarraitzen baduzu, hauen erabilera onartzen duzula ulertuko dugu. Informazio gehiago

AZKEN EDIZIOA: 2017 SARIAK

Koopera

Sabino Arana Fundazioak Koopera Gizarte eta Ingurumen Berrikuntza aintzatetsi eta saritu nahi du apustu garbia egin duelako, 25 urtetan baino gehiagotan egin ere, gizarte-bazterkeriako egoeran edo horren arriskuan dauden pertsonen gizarteratzea eta laneratzea errazten eta ingurumena sustatzen eta zaintzen. Kooperatiba-izaera daukanez gero Cáritas erakundeak bultzatutako gizarte-ekimeneko kooperatibak eta laneratze-enpresak batzen dira Kooperan, enplegu inklusiboa sortzeko konpromisoa batik bat, pertsona kalteberenen aldeko enplegua sortzeko konpromisoa eta gizarte-konpromisoaren nahiz herritarren aldeko apustua, herritarrak gizarte- eta ingurumen-aldaketaren eragile nagusiak direlakoan berrerabiltzea, birziklatzea, kontsumo jasangarria, ekonomia zirkularra… ekarpen esanguratsuak dira gizarte-kohesioa lantzeko, ekonomia zuzen eta solidarioagoa bideratzeko eta, ingurumenaren ikuspegitik, ingurune jasangarriagoa izateko.


Ramón Barea

Sabino Arana Fundazioak Ramón Barea aktorea, zuzendaria, dramagilea eta ekoizlea aintzatetsi eta saritu nahi du, azken lau hamarkadetako euskal zinema eta antzerkiaren erakusgarririk behinenetakoa delako. Honako sari honek Barearen lan eta bizimolde oparoa eta arte eszenikoei eskainitako konpromisoa aitortu nahi ditu. Azkena adierazpide ugaritan islatu da: Cómicos de la Legua, Karraka, antzerki-lan eta antzerkigile handien moldaketak eta interpretazioak, ehun film baino gehiago, film laburrak, telesailak, dokumentalak, Ur antzerki-konpainia, Pabellón 6... Era berean, Ramón Barea ezaguna dugu antzez-proiektu arriskutsu, berritzaile eta sortzaileak bultzatzen, bai eta balio berriak sustatzen ere. Azken batean, antzeztokien gaineko eta kameren ondoko bizimolde ekina eta arrakastaz beterikoa dugu Ramón Barearena.


Gerediaga Elkartea

Sabino Arana Fundazioak Gerediaga Elkartea aintzatetsi eta saritu nahi du, erakundeak Durangaldeari, bereziki, eta Euskal Herri osoari egin dion ekarpen handiagatik. Diktaduraren urte beltzetan, gizon-emakume batzuen lan, ahalegin eta konpromiso etengabeari esker ereindako haziak Durangoko Azoka bilakatu du euskal kulturgintzaren eta sorkuntzaren erdigune, elkargune eta nahitaezko hitzordu, bai eta euskal kultura mundura zabaltzeko erakusleku ere. Bost hamarkadatan baino denbora luzeagoan, Gerediaga Elkarteak Durangoko eta Durangaldeko ondare historiko, artistiko eta tradizionala ikertu, zaindu eta zabaltzeko lan eskerga gauzatu du eta, gainera, aurrendaria izan da Oroimen Historikoa lantzen eta aldarrikatzen.


Abel Barriola

Sabino Arana Fundazioak Abel Barriola aintzatetsi eta saritu nahi du erakutsi dizkigun giza eta kirol balioengatik. 19 urtetan jardun du profesional gisa, ia 700 partida jokatu ditu, txapelak jantzi eta txapelketak irabazi ditu –besteak beste, hiruko koroa: esku-pilotakoa, lau t’erdikoa eta binakakoa. Hala, Leitzako atzelariak pilotako historiaren une gogoangarrienetakoak eskaini dizkigu. Ibilbide profesional aparta izateaz gain, Abel Barriolak adierazitako balioak direla eta –profesionaltasuna, lana, apaltasuna, gizalegea, zoritxarraren aurkako kemena eta herri, kultura eta hizkuntzarekiko konpromisoa pilotaren mundutik askozaz haratago nabarmendu da. Hasten diren neska-mutilentzako kirolari eredugarri eta jende orok maite eta errespetatzen duen Abel Barriola joan den maiatzaren 7an agur esan zion pilota profesionalari eta ezabatzen gaitza den aztarna utzi digu pilotalekuaren barruan zein kanpoan.


EZ beti da EZ! ¡NO es NO!

Sabino Arana Fundazioak gure bazter guztietan entzuten den EZ beti da EZ! garrasi kolektiboaren esangura aintzatetsi eta saritu nahi du. Garrasi horrek, alde batetik, indarkeria sexista edo genero-indarkeria pairatu duten emakumeen ahots izutu eta ia beti isildua daroa; bestetik, gizartearen gaitz larri horren aurkako borroka sutsuan ibili diren eta egun badabiltzan elkarte, antolakunde, herri-ekimen eta erakundeen ahots arduratsu eta ekintzailea; eta azkenik, euskal gizarte osoaren ahots tinko eta kementsua, indarkeria-mota guztiak errotik desagerrarazteko kontzientziatze irmo eta gero eta konpromiso sendoagoa daukan ahotsa. EZ beti da EZ! adierazpenak BAIEZKO ozena eman nahi dio bazterkeria ezari, ekintza positiboari eta gizonen eta emakumeen arteko benetako berdintasunari, mundu osoan zein berton, Euskal Herrian.

© 2013-2018 Sabino Arana Fundazioa